Mellor en galego

Indignádevos!!

2011-04-12T11:10:00.005+02:00

“…Facemos un chamamento ás novas xeracións para revitalizaren e transmitiren o herdo da Resistencia e os seus ideais.

Nós dicímoslles: tomade o relevo, indignádevos! Os responsables políticos, económicos e intelectuais, e o conxunto da sociedade, non deben renderse nin deixarse amedrentar pola actual ditadura internacional dos mercados financeiros, que ameaza a paz e a democracia”.
(Stéphane Hessel).

Parva que sou

2011-03-17T09:21:00.001+01:00

Déixovos esta canción de Deolinda que interpretou no seu concerto de Ferrol, coa que moita xente das últimas xeracións se sentirán identificados.

Deolinda - Parva que sou

Sou da geração sem remuneração
e não me incomoda esta condição.
Que parva que eu sou!

Porque isto está mal e vai continuar,
já é uma sorte eu poder estagiar.
Que parva que eu sou!

E fico a pensar,
que mundo tão parvo
onde para ser escravo é preciso estudar.

Sou da geração ‘casinha dos pais’,
se já tenho tudo, pra quê querer mais?
Que parva que eu sou!

Filhos, marido, estou sempre a adiar
e ainda me falta o carro pagar,
Que parva que eu sou!

E fico a pensar
que mundo tão parvo
onde para ser escravo é preciso estudar.

Sou da geração ‘vou queixar-me pra quê?’
Há alguém bem pior do que eu na TV.
Que parva que eu sou!

Sou da geração ‘eu já não posso mais!’
que esta situação dura há tempo demais
E parva não sou!

E fico a pensar,
que mundo tão parvo
onde para ser escravo é preciso estudar.

Premio concurso de cartas: Dillo A Que Maltrata

2011-02-27T11:29:00.000+01:00

Cecilia Ramil (1º E.S.O.), foi unha das gañadoras do concurso "Dillo A Quen Maltrata". Esta foi a carta coa que participou.

19-11-2010

Laura!

Gracias por felicitarme polo meu aniversario. Agora xa é oficial, xa teño 8 anos. Gustoume moito o teu regalo! Meus pais regaláronme o boli co que escribo, ademais de un disco de música e algunhas cousas máis. A miña nai díxome que este ano non me podían regalar moitas cousas porque estamos nun “bache”. Aínda non decubrín ó que se refería con esa palabra. Ultimamente meu pai está enfadado. Non para de botar berros pola casa. Miña nai ás veces está inquieta, triste… Creo que lle ten medo a meu pai. O outro día, estaba eu durmindo, e espertei porque meu pai estaba outra vez berrando, pero berráballe a miña nai. Miña nai choraba, dicía que non quería que se enfadase, e el dicía que non a aturaba, que non servía para nada… Eu creo que iso non é verdade,porque a miña nai fai a comida, vai traballar todos os días, coida de min, limpa a casa… Pero creo que meu pai confundiuse. Ao día seguinte, díxolle ao xantar que non volvería a pasar nada, e que o que pasara fora cousa do enfado. Eu pregunteilles que que pasaba e meu pai dixo que era mellor que fora ver a tele. Non puiden resistirme, non fun ver a televisión, quedeime preto da cociña para escoitalos. Miña nai dicía que xa dixera moitas veces que no fondo a quería, pero que se enfadaba, e que ela estaba farta. Creo que ao meu pai non lle sentou moi ben isto, porque comezou a berrar como tantas otras veces atrás e dicirlle de novo que era unha inútil, que non recordaba porque casara con ela, que cada vez pensaba que era máis torpe, menos traballadora… Dicía que grazas a el había para comer na casa, que era el o que cobraba máis. Eu creo que tamén estaría enfadada. Meu pai sempre di que traballa moito, e non creo que sexa mentira. Tamén é certo que miña nai traballa bastante, pero cada vez que comete un mínimo erro, di que seu marido ten razón, que é unha inútil, que cada vez fai peor as cousas… Non creo que che interese moito o que pasa na miña casa, pero só podo falar disto contigo, porque ningún dos dous quere dicirme nada. Estou desexando que volvas e poder ir a túa casa e xogar contigo, para non ter que oír tantos berros. Miña nai di que non quere deixarme soa co meu pai, porque agora está moi estresado, pero creo que é porque ten medo de que meu pai me faga algo malo. Miña nai o outro día traía uns moratóns nos brazos, no corpo, e un no ollo. Ao final o que che dixen de que de maior quería casar con Marco, pensándoo mellor, non quero casar nunca. Vendo como é en realidade o matrimonio…

Espero verte pronto! Bicos!

BASES DO XI CERTAME DE CREACIÓN ARTÍSTICA (POESÍA E IMAXE) EN GALEGO SEN FILTRO

2011-02-23T09:58:00.000+01:00

I.E.S. S. CASANOVA / EQUIPO DE NORMALIZACIÓN LINGÜÍSTICA

BASES DO XI CERTAME DE CREACIÓN ARTÍSTICA POESÍA E IMAXE EN GALEGO SEN FILTRO

1) Poderá participar todo o alumnado matriculado/a no I.E.S. Sofía Casanova.

2) @s participantes deberán presentar unha composición plástica orixinal en calquera destas modalidades: DEBUXO, PINTURA, COLAXE ou FOTOGRAFÍA.

3) Para a realización da súa obra deberán escoller, como motivo de inspiración, unha de entre as 15 propostas poéticas da literatura universal recollidas no ANEXO destas Bases. O autor ou autora deberá indicar, no reverso da obra, o texto por el/ela seleccionado.

4) Niveis de participación:

ESO

Bacharelato e Ciclos Formativos.

5) O xurado outorgará un premios de 40 € por cada nivel.

6) O prazo para a entrega dos traballos remata o 18 de marzo de 2010.

7) A obra gañadora de cada nivel participará nunha exposición pública organizada polo CONCELLO DE FERROL. As obras editadas pasarán a ser propiedade do Concello, podendo doárllelas aos centros de ensino nos que estean matriculados os/as alumnos/as seleccionados/as.

8) Os orixinais entregaranse ás profesoras do Departamento de Lingua ou á Coordinadora do EDL, L. Suárez.

Ferrol, 8 de febreiro de 2011

EDL do I.E.S. S. CASANOVA

1º Concurso de curtametraxes pola igualdade de xénero

2011-02-09T11:44:00.000+01:00

O Concello de Ferrol convoca, a través da Casa da muller, o primeiro concurso de curtametraxes denominado "pola igualdade de xénero". Podedes aportar vídeos dun máximo de duración de 10 minutos, nos que se valorará sobre todo o contido, o tratamento do tema e a creatividade. Pódense baixar as bases da páxina do concello www.ferrol.es, para entrar directanente pinchade aquí. Animádevos!!! Hai de prazo ata o 11 de marzo.

Lembro dun que vin o ano pasado polo antroido.....

2010-12-22T16:52:00.001+01:00

Dende a diáspora deséxovos que teñades unhas felices festas,
e un próspero aninovo.

Continuade a traballar polo galego,
moita forza...

¿Onde está o ben? ¿Onde está o mal? - Ricardo Carvalho Calero

2010-10-25T23:03:00.000+02:00

Presentación carvalho calero

View more presentations from ignaciotomas.

1. Recitado de poesías de Ricardo Carvalho Calero
O día 27 de outubro de 2010, na antiga capela do centro Torrente Ballester, co gallo da conmemoración do centenario do seu nacemento, rendéuselle unha homenaxe ao profesor ferrolán Ricardo Carvalho Calero.
O IES Sofía Casanova participou xunto co CEIP Recimil, o conservatorio Xan Viaño de Ferrol e os IES Carvalho Calero, As Telleiras, Saturnino Montojo, Concepción Arenal e Canido.
A homenaxe particular do noso centro consistiu no recitado do poema “Onde está o verso ? Onde está a prosa?”, pertencente ao libro do autor titulado Futuro Condicional, xunto cunha presentación en power point con corenta imaxes alusivas ao poema e a música da canción O son do ar de Luar na Lubre.
As imaxes foron pasadas por Emérita Álvarez Gómez (4º A), Sofía Querol Herrero (3º C) fixo as fotos e unha coidada posta en escena correu a cargo do seguinte alumnado:
Cristina de Castro Rodríguez (4º B)
Catuxa Picos Rodiles (4º A)
Sofía García Conzález (4º A)
Nuria García Fonte (4º A)
Inés Amarelo García (4º B)
Adrián Rodríguez Nicolás (4º B)

actividades que vai desenvolver a plataforma cidadá Queremos Galego

2010-10-08T12:28:00.000+02:00

OS MEDIOS EN GALEGO IMPORTAN

2010-10-07T18:53:00.000+02:00

Se o desexas podes asinar o manifesto OS MEDIOS EN GALEGO IMPORTAN, para que as administracións públicas tomen a decisión de axudar aos medios en galego, no enlace que figura na imaxe.

Un relato curto

2010-06-05T10:01:00.000+02:00

Animeime a colgar este relato que fixen nun día de furia. Espero que vos guste.

A DESPEDIDA

Federico Pedreira Nores premiado no XVII Certame Literario de Cambre

2010-06-04T11:33:00.000+02:00

O alumno de 2º de Bacharelato Federico Pedreira Nores acadou o segundo premio do XVII Certame Literario de Cambre, organizado polo concello de Cambre e polos IES Alfonso X e David Buján.

Parabéns a Federico por este novo galardón!

Os nen@s tamén xogan en galego

2010-05-25T01:04:00.000+02:00

Un vídeo da asociación da hortiña, que se creou para que as crianzas de Ferrolterra poideran xogar en galego. Os nenos e nenas amósannos que aínda non teñen ningún rexeitamento pola lingua, espero que esta xeración teña a oportunidade de manter as súas raices.
Un bico para todos, sodes uns amores e seguide falando tan ben.

EU FALO

2010-04-08T11:29:00.000+02:00

Se queres ver uns videos, grabados por xente que quere deixar a súa reflexión sobre os idiomas en Galicia, podes ir a esta páxina: http://eufalo.tv/ e saberás o que se coce por este pais noso, o que pensamos a cerca das linguas e, sobre todo, os prexuízos que siguen imperando con respecto do galego.
Animádevos a grabar un vídeo e enviádeo, seguro que todos temos algo que aportar...Esto vai sobre todo por ti, Carla...

Entroido 2010

2010-03-26T11:45:00.000+01:00

Comparsa de 1º B, gañadora do segundo premio.

Título da comparsa: O Tsunami

Compoñentes:

Lucía Díaz Fabuena
Laura Mª Freire Comeselle
Ana Irazu Paz
Lucía Roque Rivera
Aida Vázquez Pardo

Noraboa

XVII certame de poesía "RICARDO CARVALHO CALERO"

2010-03-26T11:40:00.000+01:00

XI certame de relato curto "CHARLES DARWIN"

2010-03-26T11:38:00.000+01:00

Premios do certame de deseño publicitario con cartel e lema

2010-03-15T11:19:00.001+01:00

Orgullos@s do noso, orgullos@s do galego

2010-02-25T20:50:00.000+01:00

Temos novos colaboradores nos equipos de normalización.
Que vos parece?...
Estamos ou non orgullosos de falar galego?...
Eles parece que si, e que non teñen nigún prexuízo en falalo onde se atopen.
Xa está ben de sentirnos inferiores!!!

Somos o mellor... Somos lo máximo...
We are the best...

Noraboa!!

2010-02-21T22:34:00.000+01:00

Noraboa!! para Tosar que ademais de ser un gran actor é un gran galeguista.
Querémoste e admirámoste, síguenos deleitando con papeis como este e sigue sendo tan boa xente e tan natural como só o saben ser os máis grandes.
Que sorte que sexas galego...

Por Haití

2010-02-14T01:58:00.000+01:00

Por iniciativa dos rapaces/as do ciclo superior de Educación infantil do I.E.S. Sofía casanova fíxose unha recadación en solidaridade con Haití.
Os alumnos/as de este ciclo tíñamos a necesidade de facer algo en favor das víctimas do terrible terremoto que asolou esta illa. As imaxes impresionantes da tele e dos xornais fixéronnos recapacitar e pensar en todos eses nenos/as que están a quedar sen fogar e sen familia as máis das veces.
Como somos un ciclo moi sensible a todos os problemas da infancia, neste caso, sentimos que non podíamos quedar de brazos cruzados, polo que propuxemos á dirección facer unhas xornadas nas que toda a comunidade educativa deste centro tivese a oportunidade de aportar o seu grao de area pola causa de Haití e, regalamos uns marcapáxinas que nos lembraran que entre todos podemos chegar a mellorar as condicións de vida dun lugar, tan lonxano no mapa pero, que está tan preto do noso corazón.
Desexamos dar as grazas pola vosa participación, que irá íntegra para Unicef, tal e como decidimos por maioría.
Esperamos que non quede aí a nosa proposta e que moitos centros nos sigan e fagan realidade esta mensaxe que queremos transmitir:
"Xuntos podemos facer un mundo mellor, un mundo que non teña máis fronteiras que poñan freo a esta merea de solidaridade".

Haití

View more presentations from merno.

"Non se pode tratar igual aos desiguais"

2010-02-02T23:31:00.000+01:00

O Consello da Cultura presenta o seu ditame, moi desfavorable ao decreto sobre o plurilingüismo

O organismo da Cultura rexeita a equiparación do inglés ás dúas linguas oficiais, descarta a consulta aos pais e esixe "un papel de reforzo para o galego"

O ditame rexeita de plano tanto a consulta aos pais -«non se xustifica como unha aposta democrática... pode xerar tensións innecesarias nas comunidades educativas e nos centros escolares... imposible de tornar operativa, é invasiva das competencias e responsabilidades da administración»- como a equiparación do inglés ás dúas linguas oficiais autonómicas -«inviable na práctica, ao menos a curto e medio prazo»-.
Tamén pon en cuestión o equilibrio entre o galego e o castelán. O Consello declara que non existe: «Todos os estudos sociolingüísticos avalan que a lingua hexemónica en Galicia é o castelán (aínda que non sexa a maioritaria)». E engade: «A competencia bilingüe nas dúas linguas non se pode asentar sobre a filosofía do equilibrio lingüístico na escola. Require un papel de reforzo para o galego».

O veredicto do Consello da Cultura non admite interpretacións. Reclama un trato máis favorable para o galego. E apela aos políticos e ao Executivo autonómico para que busquen a «unanimidade» nesta materia, para que non se dean «pasos atrás non proceso de recuperación do galego» e para que «deixen de recorrer nos seus discursos ao galego como problema». Segundo Villares, «Non se pode tratar igual aos desiguais».

Ver a noticia completa na Voz de Galicia

A praza do Obradoiro a tope

2010-01-29T20:39:00.000+01:00

Estou de acordo contigo Carla, foi un día memorable, e para lembralo podemos ver este vídeo, no que ademais de emocionarnos vendo a praza do Obradoiro enteira cantando o noso himno, podemos practicar as nosas dotes detectivescas buscando a algún coñecido...

PAREMOS ESTE DECRETAZO!!21 DE XANEIRO:)

2010-01-26T21:59:00.001+01:00

O pasado xoves 21 de xaneiro tivo lugar en Santiago de Compostela a manifestación contra o actual decreto lingüístico que se quere levar a cabo polo actual partido.

Decenas de miles de manifestantes colapsaron dende o mediodía o centro histórico de Santiago nunha masiva protesta cidadá contra as bases do decreto do galego, que reduce a presencia deste idioma nas aulas e da aos pais voto para elixir a lingua na que se imparten asignaturas troncais. A praza do Obradoiro, cunha capacidade aproximada de 25.000 persoas, estaba completamente chea cando aínda quedaban miles de manifestantes desfilando pola zona vella da cidade hacia o epicentro da protesta. A Policía Local de Santiago calcula que acudiron 30.000 persoas ao chamamento.

Visto o que tivemos oportunidade de ver o 21 de xaneiro do 2010 en Santiago de Compostela, podemos sentirnos satisfeitos e cheos de honra, xa que aínda que moitos reneguen o noso, podemos presumir de deixar por todo o alto a praza do Obradoiro de Santiago, as nosas voces fortes cantando o noso himno e defendendo só o que está dentro de nós e queremos que perdure por e para sempre: A LINGUA GALEGA!

e seguiremos coa loita...

Novos materiais na biblioteca do centro

2010-01-26T13:58:00.000+01:00

O centro conta con dende hoxe con materiais que vos poden resultar interesantes.

Temos un DVD que inclúe unha escolma de oitenta e dous capítulos do espazo televisivo Ben Falado!, emitidos na Televisión de Galicia desde xullo de 2008 ata xullo de 2009. Trátase dunha
serie de microespazos que teñen como finalidade a promoción e a difusión da lingua galega e que, asemade, contribúen a un achegamento didáctico ás estruturas lingüísticas do galego a través de explicacións sobre toponimia, fraseoloxía, gramática ou morfoloxía.

Tamén vinte números da revista de cómic galego Galimatías. Esta revista naceu en abril de 2009 co obxectivo de achegar historietas en lingua galega a todos os rapaces e rapazas, e conta coa colaboración dalgúns dos mellores debuxantes de Galicia, como Fran Bueno, Enma Ríos, Ramón
Marcos, Álex Cal ou Macaco. Galimatías confórmano series como “Amor inmortal”, que se ofreceu en primicia na revista; “Hexed. A marca de Lucifer” e mais “Vento do norte”, que chegaron directamente de Estados Unidos; e outras que se crearon en exclusiva para a publicación.
A revista tamén conta cun espazo virtual (http://www.ouniversodegalimatias.com/) que vén de recibir o premio Eganet á mellor web de comunicación 2009.
Trátase dun espazo complementario no que as series e todo o universo Galimatías están reflectidos e ampliados. Nela, podedes atopar distintos contidos relacionados co mundo da banda deseñada, coa animación ou coa música en lingua galega.

Resposta da Real Academia galega ao borrador do Decreto sobre os usos lingüísticos no ensino

2010-01-20T10:17:00.001+01:00

FUNGI: o reino dos recicladores

2009-12-29T19:10:00.000+01:00

Ancorados ao chan entre o humus do bosque, en prados húmidos e umbríos ou sobre unha morea de esterco, os fungos non semellan animais pero tampouco son plantas. Constitúen un reino independente coas súas singularidades: son heterótrofos, coma os animais (obteñen o seu alimento doutros seres vivos), non se desprazan e reprodúcense por esporas.

Moitos fungos podrecen a madeira e moitos restos orgánicos, reciclan a materia e fana chegar ás plantas para que nada se perda no camiño da materia. Son os recicladores.

A parte visible de moitos fungos, formada polo pé e o sombreiro, é coñecida como cogomelo ou seta e é o órgano reprodutor dos fungos pluricelulares, como as amanitas ou os champiñóns.

Todos os cogomelos son fungos, pero hai tamén fungos coma as levaduras, os mofos, os esclerodemas, as pezizas, o vómito de bruxa, o peido de lobo... que non desenvolven pé nin sombreiro, aínda que todos necesitan da caída das esporas no chan para se reproduciren.

Cando recollemos cogomelos, para comer ou expoñer, debemos deixar no chan a súa conexión coa terra, que é o que chamamos micelio: non se ve, pero o vindeiro ano xermolará de novo e sairán novos individuos máis ou menos no mesmo lugar.

As observacións no campo coa axuda de persoas experimentadas, as exposicións didácticas, os cursos realizados polos concellos concienciados polo tema, etc. son dun valor incalculable para poder coñecelos e gozar deles.

Fungos

UN CASO PARTICULAR

De entre todos os fungos, hai un que sobresae entre todos os demais no que a mitoloxía se refire: trátase da Amanita muscaria, coñecida en galego como reventabois ou matamoscas debido ás súas propiedades alucinóxenas e psicoactivas.

Moitas tribos siberianas empregaron cogomelos de Amanita muscaria (ou, como se denominaban en Siberia, "wapaq") como vehículo para acadar a éxtase en rituais chamánicos. A lenda conta que un heroe cultural chamado “Gran Corvo” capturou unha balea, pero non era quen de devolvela ó mar, e implorou a unha divindade superior, Vahiyinin, quen lle di que vaia a un determinado lugar, onde atopará os wapaq: se os come, daranlle a forza necesaria para axudar á balea. Vahinin cospe sobre a terra, e alí onde cae a saliva medran os wapaq. Unha vez inxeridos, consegue axudar á balea e, eufórico, exclama: “¡Oh, wapaq, medrade sempre sobre a terra!

Tamén protagoniza outra lenda, presente na antiga Iugoslavia nos anos 50. Nela cóntase como o deus Wotan, fustrigado por unha lexión de demos cabalga polo bosque a fume de carozo. Os espumallos de sangue que caen da boca do seu esgotado cabalo son a orixe destas amanitas, que agroman no bosque ao ano seguinte, cos seus sombreiros vermellos polo sangue e tinguidos de saliva en forma de copiños brancos.

Por último, en Guatemala o raio enxendra a Amanita muscaria, coñecida polo pobo maia-quiché como “Kakuljá okox” (fungo do raio) e vencellada ó deus do lóstrego, Rajaw Kakuljá, quen tamén dirixe aos chacs, unha sorte de ananos portadores da chuvia.

Como conclusión, hai que recalcar a importancia dos fungos alucinóxenos, especialmente a Amanita muscaria, na creación de mitos e o seu papel coma sacramento en moitas relixións animistas.

Feliz Nadal e próspero aninovo a todos.

FELICITACIÓNS DE NADAL EN INGLÉS

2009-12-22T12:13:00.000+01:00

Este ano a profesora Mª José Vázquez e eu mesma, Mª de los Ángeles Quintana, propuxémoslles ós alumnos de 1º ESO (A e B) e 2º ESO (A, B e C) elaborar tarxetas de felicitación en inglés para dárllelas ós amigos e achegados.
A resposta foi tan boa (en cantidade e calidade) que lle propuxemos ó director outorgar un premio por curso á mellor tarxeta.
As gañadoras foron por 1º A Estefanía Rodríguez Galdo, 1ºB Antía Rodríguez Vázquez, 2ºA Andrea López Picos, 2ºB Mónica López López e 2º C Marta Eireos Currás.
Os premios consistiron nun vale por valor de 15€ e un libro de lectura en inglés para cada unha das gañadoras.
Ademais, serviunos para decorar a entrada.
Esperamos que o ano que vén se repita.

http://picasaweb.google.es/infoxan/ConcursoPostalNadal2009?authkey=Gv1sRgCP3gsZvRsbiCKw&feat=email#

Por un nadal para todos

2009-12-19T23:08:00.000+01:00

Este ano, nas festas, temos a oportunidade de ser solidarios pasándoo ben en "Ócio nadal" ( onde podes canxear un xoguete novo, que chegará aos nen@s dos que sempre se esquece Papá Noel, por unha entrada) e mercando os agasallos no "Mercado de artesanía, comercio xusto e productos ecolóxicos", ademais de encher o bandullo de turrón e lambetadas...

Si queredes ver máis debuxos de Leandro Lamas, que a min persoalmente me encantan, podes ver o seu blog pinchando aquí: http://leandrolamas.blogspot.com/

2009-12-19T16:39:00.000+01:00

Que teñades boas festas. Espero que vos guste esta panxoliña. E si queredes disfrutar de unha manchea de elas, cada cal mellor, podédelas atopar no Quiquiriquí onde as interpretan cantantes tan emblemáticos como: Mini, Guadi Galego, Pilocha, Uxía,...Son preciosas !!!!!

ORELLA PENDELLA

2009-12-12T08:46:00.000+01:00

Si queredes ver unha páxina na que se recopilan todo tipo de ditos, recitados, cancións de berce,etc... co obectivo de que a cultura galega non se perda na próxima xeración, e que os nosos fillos teñan o privilexio de escoitar as mesmas verbas dos nosos avós, e así podan herdar esa retranca da sabiduría popular galega.

Podes ver esta páxina, aprender algún recitado,... e si queres facer algunha aportación que non está rexistrada, podes incorporala á súa base de datos.
http://www.orellapendella.org/

Darío Xohán Cabana recitando a Eduardo Pondal

2009-12-11T11:44:00.000+01:00

Unha gran variedade de música en galego

2009-12-08T00:20:00.000+01:00

Atopei un blogue que ten dixitalizada e lista para descargar todo tipo de música en galego:

Sempre en Galiza

A idea deste blogue é recuperar obras da nosa música galega, que foron quedando acurrunchadas polo paso do tempo en vellos vinilos, casetes, singles, EP's, etc. e que están agardando unha oportunidade para ser dixitalizadas e espalladas de novo.

Non tedes mais que ir abaixo da páxina para ver a listaxe completa. Espero que sexa de utilidade.

"Achegarte" á Coruña esta fin de semana

2009-11-25T22:04:00.000+01:00

Esta fin de semana terán lugar na Coruña case 100 actividades adicadas á cultura galega: ACHEGARTE.

Pincha na imaxe e podes acceder á programación: obras de teatro, obradoiros de banda deseñada, graffiti, concertos, etc........e todo de balde!!!

2009-11-23T22:01:00.000+01:00

Si queredes amosar a vosa vea literaria, aquí tedes algúns dos certames literarios aos que vos podedes presentar en vindeiras datas.
Picade nestes enlaces:
http://www.culturagalega.org/certames.php
http://axendaaelg.blogaliza.org/category/convocatorias-poesia/
http://axendaaelg.blogaliza.org/category/fallos-poesia/
http://www.xuventude.net/web/xuventude/expresate
http://www.aelg.org
http://www.bvg.udc.es/novas/novas.jsp

ANÍMATE E PARTICIPA!!!

Posible fichaxe

2009-11-19T17:49:00.000+01:00

O Barcelona está pensando en fichar a Robinho e nós estamos en trámites de fichar a Leo arremecaghoná ou En-riquinho, para un concerto que podería ser no Día das Letras Galegas.

Aquí tedes un vídeo no que Leo apréndenos a facer unha canción pop coa que triunfar nos 40 principais.

Eduardo Blanco Amor (1897-1979)

2009-11-17T20:12:00.000+01:00

Nacido en Ourense no ano 1897, ao que nos seus relatos chama Auria, con agarimo e paixón, no seo dunha familia modesta e autodidacta, comezou a escribir en El diario de Ourense.
Antes de emigrar a Arxentina, participou no ambiente literario da cidade das Burgas e coñeceu o maxisterio de Risco, fundamental no seu posicionamento militante en defensa da causa galega e da universalidade da nosa literatura. Instalado en Bos Aires, proseguiu a súa formación en contacto coa vida cultural da emigración e con intelectuais e artistas do continente. En 1923 fundou con Isla Couto a revista galega Terra e, tres anos máis tarde, ingresou na redacción do diario La Nación. A súa carreira literaria comezou en 1928 coa publicación de Romances Galegos. Tivo contacto con intelectuais do Partido Galeguista e do Grupo Nós. Aquí escribiu Poema en catro tempos (1931), longa composición sinfónica de filiación vangardista que publicaría na Arxentina.

Xa en Bos Aires, Otero pediulle que colaborase na revista Nós, onde Blanco Amor publicou varias obras, entre elas poemas. Na segunda estadía (1933-35), coñecería algúns dos membros da Xeración do 27 española. Tras o levantamento militar, defendeu desde a Arxentina a legalidade prebélica e o Estatuto de Autonomía e impulsou o espallamento da nosa literatura no continente americano. Porén, até o ano 1956, en que publica Cancioneiro, a súa produción literaria estivo redixida en español, nun intento fallido de se integrar na cultura española. Fundou e dirixiu o Teatro Popular Galego (1957), agrupación dramática de curta vida. Antes de abandonar definitivamente América, Blanco Amor publicou A Esmorga, libro que se constituiría nun dos grandes fitos da renovación da narrativa galega e Xente ao lonxe. Xa de volta en Galiza, regresa tamén á cultura e a lingua galegas, dando ao prelo outra obra de enorme éxito: Os biosbardos (1962). Morreu en Vigo en 1979.

O único que podo dicir é que para min e penso que para moitos de nós, Blanco Amor segue e seguirá a ser un dos grandes no panorama literario galego.

A praia dos afogados. Domingo Villar

2009-11-12T22:03:00.000+01:00

Hai uns días rematei de ler unha novela que me enganchou, e que recomendo aos alumnos de 2º bacharelato.

Algúns chámanlle o Stig Larsson galego, pero agás de compartir xénero, a mín non se me parece para nada.

Dúas personaxes moi ben definidas: O inspector Caldas, máis parecido ao inspector Wallander de Henning Mankell que ás personaxes de Millenium, investiga a morte dun mariñeiro que aparece nunha praia da vila de Panxón, na ría de Vigo. Un caso difícil para Caldas, que pasa malos momentos.

E Rafael Estévez, o seu axudante aragonés, que non se dá adaptado á retranca e os sobreentendidos dos galegos, non parece servir de moita axuda, e colle une tremendos rebotes coas respostas ambigüas desta xente que non entende.

Unha parella que daría moito xogo nunha película ou nunha serie televisiva (esta é a segunda novela do inspector Caldas, e pode haber máis entregas).

DKTC: o rap, mellor en galego.

2009-11-05T22:49:00.000+01:00

DKTC son as iniciais de Dios ke te Crew, grupo galego de música rap. O grupo nace en Ordes (A Coruña) no ano 2003, trala unión dos grupos "5 talegos" e "Ghamberros", tamén de Ordes.

A súa primeira grabación fíxose para o documental "Hai que botalos", con motivo das eleccións ao Parlamento Galego, a canción chamouse "Herdeiros da Ditadura", que é a súa canción máis popular.

Logo de participacións en festivais e temas soltos, sacan en 2006 o LP "Xénese", sendo o primeiro disco de rap totalmente en galego. O LP ten dazaséis temas, cunhas letras que presentan a realidade cultural, política e social de Galicia, con humor e ironía, vista baixo a punto de vista duns xóvenes de ideoloxía nacionalista. Apreciamos os temas do disco só con ler títulos como "Ke traballe o rei!", "Vas de verde" (crítica á Garda Civil), "Política de asfalto" (crítica do Partido Popular), ou "Colleita´s party" (sobre o agro galego).

Deíxovos co seu, para min, mellor e máis coñecido tema:

"... a lingua mantivémola calándolle ao cacique, falando ao pé do lume só: a lingua vaise a pique... dime cantos son: un, dous, tres, catro... seiscentos anos de represión!"

VI FIADEIRO DE LECTURAS COMPARTIDAS

2009-10-30T11:33:00.000+01:00

É unha actividade promovida polo Equipo de Normalización Lingüiística do noso instituto, dirixida aos xoves aos que lles gusta a lectura. Nesta actividade, á parte de falar con outras persoas sobre os libros, tamén aprenderemos a expoñer e expresar cousas diante de máis persoas.

No fiadeiro leremos de maneira individual na nosa casa un libro en galego dalgún/unha autor/a contemporáneo/a; despois, nunca sesión de tarde, xuntarémonos para expoñer a nosa opinión. En principio leremos só dúa obras, que serán acordadas entre todos/as os/as interesados/as. Dicir ademais que non haberá que mercar os textos, pediremos un préstamo na biblioteca.
Para apuntarse, fala co profesorado de Lngua Galega e Literatura.

Ferrol, 21 de outubro do 2009
Equipo de Normalización e Dinamización Lingüística

Coa lingua de fóra - Quempallou

2009-10-23T22:52:00.000+02:00

Un dos grupos que máis me gusta do noso país, con unha peza que ven que nin pintada

"Din que temos lingua, e será verdade,
sácalla para fóra, non a agoches máis"
...
"moito traballiño deu, que trunfara a razone,
para poder usar a lingua, que nos sae do corazone"
...
"e se hai quen che diga que non lle gusta o galego,
ti dille non te preocupes, que por ti xa falo eue,
pero ainda é boa vergoña, non saber o que é de teue"

A imparábel forza do cómic galego

2009-10-23T04:29:00.000+02:00

Poucas veces na historia do cómic deste país se deu unha concentración tan brillante e importante de autores como a que está a vivir Galicia nesta primeira década do século XXI: Kiko da Silva, David Rubín, Jacobo Fernández, Martín Romero, Diego Blanco, Brais Rodríguez, Alberto Guitián, Jano, Miguel Porto, Víctor Rivas, Emma Ríos, Manel Cráneo ou Alberto Vázquez; unidos aos xa consagrados: Miguelanxo Prado, Fran Bueno, Fernando Iglesias, Víctor Rivas, Norberto Fernández ou Carlos Portela.

E todos eles dende o compromiso coa lingua propia, demostrando que facer cómic en galego non só non impediu que as obras se coñezan fóra de Galicia, senón que ademais non foi obstáculo para que recibisen o apoio de prestixiosos premios como os do Saló del Còmic de Barcelona.

Podedes atopar información sobre eles e as súas obras no portal de banda deseñada galega

Outro blog galego sobre o cómic en xeral ao que botar unha ollada: Fancomic

Vía: El País

A fala

2009-10-23T00:16:00.000+02:00

O músico Roi Casal interpretando este poema de Manuel María

O idioma é a chave

coa que abrimos o mundo:

o salouco máis feble,

o pensar máis profundo.
...

O idioma é a vida,

o coitelo da dor,

o marmurio do vento,

a palabra de amor.
...

O idioma é o tempo,

é a voz dos avós

e ese breve ronsel

que deixaremos nós.
...

O idioma é un herdo,

patrimonio do pobo,

maxicamente vello,

eternamente novo.
...

O idioma é a patria,

a esencia máis nosa,

a creación común

meirande e poderosa.
...

O idioma é a forza

que nos xungue e sostén.

Se perdemos a fala

non seremos ninguén!
...

O idioma é o amor,

o latexo, a verdade,

a fonte da que agroma

a máis forte irmandade.
...

Renunciar ao idioma

é ser mudo e morrer.

precisamos a linguase

queremos vencer!

A fala - Manuel María

Vía: ensino en galego